93) අත නොගාන පිරිමි කකුල ..

එහෙම නම් අළුත් අවුරුද්දේ “ආයුබෝ .....“ කියල අළුත් post එකක් ලියන්නයි පටන් ගන්නේ ..කියන්න එපායැ , මේ පෝස්ට් දැමිල්ලත් පොඩි සෙල්ලමක් වගේ , මොකද ලියන්න යමක් , හේතු සාධකයක් මතුකර ගන්න එපායැ . හේතුය මම ලියන මේ කතා නව කතාවක් වගේ දිගට ගලා යන්නේ නැහැනේ , දවසින් දවස “මොකක් හරි “ අළුත් දෙයක් ලියන්නයි හිත , ඒත් මේ මාතෘකා , පොතක් කියවනව වගේ කියවගෙන යන්න තිබුණොත් දිගටම කියවන්න කැමැත්ත ඇතිවෙන්නේ බොහොම ටික දෙනාටයි , මොකද හුඟ දෙනෙක් හිතාගෙන ඉන්නේ , “අපිට ඔය ලෙඩ නැහැ , අනෙක ලෙඩ වුනාම ගිහින් බෙහෙත් ටිකක් ගන්න පුළුවන් නේ ,“ කියල ..නමුත් මම දන්නවා මේ කියනව ඔබ , ඔබ ගැන පරිස්සම් වෙන්න කැමති , ලෙඩක් දා ගන්න ඉස්සර වෙලා , එයින් ගැලවෙන්න පුළුවන් මඟක් තිබේනම් ඒ මඟගන්න කැමැති කෙනෙක් බව ...ඔව් ඉතින් ඒ නිසානේ “මේ බයිලා“ කියවන්නේ නේද ?...

හෙට නිවාඩු නිසා අළුත් පෝස්ට් එක හෙටම ලියනවා කියල හිතාගෙන , ලැබුණූ විවේකයේ අන්තර්ජාලයේ සැරි සැරුවා , හැමදාමත් වගේ පත්තර , අළුත් ප්‍රවෘත්ති , nasa.gov , usgs.gov ඊට පස්සේ ඉතින් සිංදු ටිකක් අහලා දවසේ කටයුතු පටන් ගන්නවා ...අද එහෙමයි ...

“ගැටළුවක් තිබේ....“ ....Google talk එක පැත්තෙන් පණිවිඩයක් මතුවුනා , ...

“ අහන්න ...‘‘ මාත් තේ එක අතේ තියාගෙන නුහුරු අතින්ම පිලිතුරක් දැම්මා ..,
“බබාගේ කකුල් , නාහේ එහෙම හදන්න එපා කියනව නේද?ඒත් බලත්දි හැමෝම හදනවනේ ....! ....“  ..මෙතැනින් පටගන්න කතාව විනාඩි දොළහක්ම ගියා ..ඒ කතාවෙන් මට හොඳ වටින දෙයක් හම්බ වුනා , අන්න ඒ තමයි අද ලිපියේ මාතෘකාව වෙන්නේ ,

ඔව් , අපේ හුඟක් වැඩිහිටි අය කියනවා “පොඩි එකාගේ “ කකුල් ඇදල අත ගාල හැදුවේ නැත්නම් ඇද වෙනවා! “ ...ඒ නිසා අත්තම්මල පුංචි එකාගේ නාහේ මිරිකළ ඇදල හැඩ කරනවා , කකුල් තෙල් ගාල ඇද අරින්න හදනවා ...මේ දෙවල් මෙහෙම සිද්ද වෙනවා , නමුත් මේ ක්‍රියාවේ වෛද්‍ය විද්‍යාත්මක ප්‍රථීපලයක් නැහැ , හැබැයි අම්ම , තාත්ත , ආදරේට පොඩ්ඩව  නැත්නම් පොඩ්ඩිව අතගාල , පිරිමැදල හාදුවක් දෙන එක හරිම වටිනවා , මොකද ඒ උණූසුමට , ස්ඵර්ශයට පැටිය හරිම කැමතියි ,

හැබැයි අද මම කතා කරන්නේ මීට වඩා වෙනස් තත්ත්වයක් ගැන , ඒ තමයි උපතෙදිම දරුවගේ පාදයේ පහළ කොටසේ සිදුවන විකෘති තත්ත්වයක් , මේකෙදි වෙන්නේ  පාදය පැත්තකට ඇඹරිලා වගේ පිහිටීමක් , තව විදියකින් කිව්වොත් කකුලේ යටි පතුල හරියට පොළොවෙ වදින්නේ නැහැ , පැත්තකට ගිහින් , ඇතුලට නැමිලා වගේ ...මේ කියන දේ පැහැදිලි නැත්නම් මේ පිංතුරේ බලල ඉන්නකෝ ...

දැන් මතකද මෙහෙම දරුවන් ඔබ දැකළ ඇති , සමහර විට මග තොටේදි , නැත්නම් රෝහලේදි ...මෙන්න මේ පාදයේ විකෘතිතාවය අපි වෛද්‍ය විද්‍යාවෙදි නම් කරන්නේ ..Congenital talipes equinovarus නැත්නම් කෙටියෙන් CTEV කියල ..දිග වැඩියිනේ ..අපි මේකට කියන අනිත් නම් මතක තියා ගනිමු , ඒක ලේසියි ..Clubfoot ...එහෙමනම් අපි දැන් කතාව පටන් ගනිමු Clubffoot ගැන...



ලෙඩේ ගැන කියන්න ඉස්සර වෙලා , තැන ගැන ටිකක් කතා කරල ඉමුකෝ .. බලන්න මේ නම් කළ පාදයේ රූප සටහන , අපැහැදිලියි නේ ? ..ඔව් අපැහැදිලියි , මොකද පාදයේ ක්‍රියාකාරීත්වයට එක්වන , අස්ථි , පේෂි , ස්නායු , බන්ධනී ආදිය ඔක්කොම හඳුනාගන්න විදියට පිංතූරයක් දාන්න ගියොත් මේ මුලු ලිපියම පුරා කකුල පුරවන්න වේවි , ඒතරම් සංකීර්ණ , ඒ වගේම එකිනෙක සමානුයෝජනයක් සහිතව කටයුතු කරන ඒකකයක් තමයි පාදය . ඉතින් මේ යම් කොටසක ක්‍රියාකාරීත්වයේ වෙනසක් , දුර්වල වීමක් වුනොත්  අපිට නිසි ලෙසින් පාදය පොළොවේ තබන්නට බැරි වෙනවා , ඒ විතරක්ද , අපේ සෘජු කාය විලාශය පවත්වා ගන්නත් අමාරු වෙනවා . අනෙක දන්නවනේ , අපි හිට ගෙන ඉන්නකොට , ඇවිදින කොට අපේ ඇඟේ මුළු බර දරන්නේ මේ පාද දෙක , ඉතින් එහි යම් අඩුවක් වුනොත් , මුළු ඇඟටම ඒක අපහසුවක් , “ඇඟේම ලෙඩක් “ බවට පත්වෙනවා , ඒ නිසා මේ කරුණ ගැනත් ටිකක් අපි අවදානය යොමු කරමුනේද ?...




ඔව් දැන් අපි දන්නව CTEV කියන්නේ උපතින්ම ඇතිවන , පාදයේ විකෘතිතාවක් බව , දරු උපත් දහසකින් එකක් මේ තත්ත්වයට පත්වෙන්න පුළුවන් බව අද හදුනාගෙන තිබෙනවා , එයිනුත් කොළු පැටවුන්ට අවදානම ටිකක් වැඩියි , ඒ විකෘතිතාවය එක් කකුලකට පමණක් සීමා නොවී පාද දෙකේම පවතින්න ලොකු ඉඩක් තිබෙනවා , මේක උපතේදිම පෙන්වන ලක්ෂණයක් නිසා , දරු උපතින් පසු බබාව බලන ළමා රෝග විශේෂඥ වෛද්‍යවරයා මේ තත්ත්වය ඉතාමත් පහසුවෙන් හඳුනගන්නවා , නමුත් ඊට ඉස්සර වෙලා ... ඒ කිව්වේ බබා ලැබෙන්න මාස දෙකකට විතර ඉස්සරදි Scanning පරික්ෂණය කරනකොටම මේ තත්ත්වය “ලැබෙන්න ඉන්න දරුවට තිබේ දැයි“ දැනගන්න පුළුවන් . කොහොම වුනත් මේ විකෘති තත්ත්වය හදුනානොගෙන  මඟ හැරෙන්න තිබෙන අවස්ථාව විරළයි , ඔබේ වෛද්‍යවරයා , නැත්නම් වෙනත් සෞඛ්‍ය නිළධාරියෙක් මේ තත්ත්වය හදුනාගන්නවා , ඒ නිසා අළුත උපන් දරුවත් එක්ක ගෙදර එන්න ඉස්සර වෙලා , මේ ගැටළුව ගැන සහ කළ යුතු ප්‍රතිකාර ගැන ඔබ දැනුවත් වේවි , කොහොම වුනත් මේ Clubfoot වල උග්‍රතාවය අනුව ප්‍රධෘන අවස්ථා හතරකට බෙදන්න පුළුවන් , ඒ අනුව Grade 1 ඉඳළ IV වෙනකම් වර්ග කරනවා.

කොහොමද මේක වෙන්නේ ? ..අපි මීට ටිකකට ඉස්සර වෙලා කීවනේ පාදය සැකසෙන්නේ පද්ධති ගණනාවක සාමුහික එකතුවකින් කියලා , ඉතින් මේ යම් පද්ධතියක , නැත්නම් කිහිපයක වෙනසක් නිසා තමයි CLubfoot ඇති වන්නේ ..සමහර විට ඒ ප්‍රෙද්ශයේ ස්නායු ක්‍රියකාරීත්වය , ඒ සමඟම පේෂී වල දුර්වලතාවයක් ඇතිවීම හේතු වෙන්නත් පුළුවන් , නමුත් බොහොම අවස්ථාවල සිදු වෙලා තිබෙන්නේ පාදයේ පේෂි , අස්ථි වගේ දේවල් එක්නෙකට ගැට ගහන “ලණූ වගේ“ පටක වල විකෘති වීම් ,

ගර්භාෂයේ ඉන්න කාළෙම කකුල බලන හැටි 

දැන් අහන්න නම් එපා මේකට හේතුව මොකක්ද කියලා ? මොකද උත්තරේ හරි ලේසියි “දන්නේ නැහැ“ ....ඔව් තවම හරියට මේකට හේතුවක් හොයාගෙන නැහැ , හැබැයි ගර්භනී කාළයේ ගර්භාෂය තුල තිබෙන්න ඕන “ආරක්ෂක දියර “ ප්‍රමාණය අඩුවීම හේතුවක් වෙන්න පුළුවන් කියන මතයක් තිබෙනවා , මොකද එහෙම වුනාම “පැටියට ගර්භාෂය පුරා දඟලන්න  තිබෙන හැකියාව අඩුවෙලා , ගුළිවෙලාම ඉන්න වෙනවා , එහි ප්‍රතිපලයක් විදියට මේ විය හැකියි කියන කරුණ තහවුරු කරගැනීමට ගැන දැන් පර්යේෂණ කරනවා , ඒ වගේම දෙමව්පියන්ගේ ඇඟේ සෛල වල න්‍යෂ්ඨියේ ඇතුලේ තිබෙන , අපේ සියළු තොරතුරු , විස්තර , අනාගතේ ගැන ගබඩා කරගත්ත වර්ණදේහ , නැත්නම් Chromosome කියන “කේන්දර පටි වල“ වෙනසක් නිසාත් මෙය මෙම තත්ත්වය ඇති වන්නට පුළුවන් බවත් ඊට ප්‍රධානම බලපෑම කරන්නේ වර්ණදේහ අංක 17 කියන කෙනා බවත් අද යම් තරමකින් හඳුනාගෙන තිබෙනවා , මේ සඳහා සිගරට් දුමත් උදව් වෙනව ඇතැයි සැක කෙරෙනවා , නමුත් තවමත් ඒ ගැන පර්යේෂණ වෙමිනුයි පවතින්නේ .. ඒ නිසා හේතුව මොකක්ද කියල ඇහැව්වොත් අපිට නම් හරම ලේසියි උත්තරේ .....

දැන් මේ ලෙඩේට ප්‍රතිකාර කරන්නම ඕනද කියල ඔබ අහන්නේ නැහැ , මොකද අපිට තේරෙනවා මේ තත්ත්වයට ප්‍රතිකාර නොකළොත් අනාගතේදි දරුවට පොළොවේ “පය ගහල “ ඇවිදින්න බැරි වග , ඒ නිසා මේ තත්ත්වය හඳුනගෙන නිසි කාළයේදි , නිසි ප්‍රතිකාරයට යොමු වීම අවශ්‍යමයි , ඔව් ...මේ පොඩි එකාට වදයක් දෙන්නේ කොහොමද කියල ඔබ හිතාවි , නමුත් ....මේ “පුංචි කරදර“ ටික කරල , දරුවගේ පාදයේ විකෘතිතාව සම්පුර්ණයෙන් , නැත්නම් කල හැකි උපරිම සාමාන්‍ය තත්ත්වයට ගන්න එක දෙමාපියන් විදියට ඔබේ යුතුකමක්

කාළෙන් කාළෙට දාන ප්ලාස්ටර් ...

ප්‍රතිකාරයේදි පාදය හැඩ ගැස්විම සඳහා Plaster of paris බදාමයෙන් දාන cast  ලොකු මෙහෙයක් කරනවා , වැදගත්ම දේ පුළුවන් තරම් ඉක්මණින් ඒ ප්‍රතිකාරය පටන් ගන්න එක , සමහර විට දරුව උපත ලබල පැය කිහිපයකින් මේ ප්‍රතිකාර මාලාව පටන් ගන්න පුළුවන් , වඩාත් ඉක්මණින් ආරම්භ කිරීම තමයි හොඳම ප්‍රතිපලයක් දෙන්නේ , මේ විදියට දාන cast සමහර විට වරින් වර ඉවත් කරමින් ,නැවත අළුතින් යොදමින් මාස කිහිපයක් , සමහර විට වසර තුනක් පමණ වෙනකම් වුනත් ප්‍රතිකාරය කෙරෙන්න ඉඩ තිබෙනවා ,

විශේෂ ප්‍රතිකාර වුනාට “විසේ“ අඩු කරනේ කෝමැයි 

සමහර විට ඊට  පස්සෙත් brace කියන උපාංගයක් සවි කරල පාද නිවැරදි පිහිටීමේ පවත්වා ගන්නත් වෙන්න පුළුවන් තව ටික කළක් යන කම් , සිමිත අවස්ථාවකදි පාදයේ සුළු සැත්කමක් කරල අපි අර මුලින් කී “ලණූ පට“ වගේ පටක වල පොඩි කැපීමක් කරන්න වෙන්නත් පුළුවන් , කොහොම වුනත් මේ වැඩේට
දෙමාපියන්ට ලොකු කැපකිරිමක් කරන්න වෙනවා , ඒ වගේම මේ දරුවාගේ පාදය රැක බලා ගැනීම පිළිබඳ පුහුණුවක් ලබා දෙන්නත් ඔබේ රෝහල කටයුතු කරනවා , මේ සියල්ල හරියට කර ගත්තොත් අවුරුදු පහේදි කරදරයක් නැතිව ,කිසිම වෙනසක් නැතිව  පොඩ්ඩට ඉස්කෝලේ  යන්න පුළුවන් වේවි , ඉතාම සීමිත අවස්ථාවකදි මේ ලොකු වුනු දරු පැටියට “විශේෂීත සපත්තුවක්“ පළඳින්න උපදෙස් දෙන්නත් පුළුවන් , කළබල වෙන්න එපා , මේ බොහොම අඩු අවස්ථාවක් , එහෙම වුනොත් ඔබේ සෞඛ්‍ය කණ්ඩායම විසින් ලබා දෙන මිනුම් , අගයන්ට අනුව නිවැරදි “විශේෂීත පාවහන්“ පැළඳුවාම දරුවාට වෙන අපහසුතාව අඩු කරන්නට පුළුවන් .

ඔන්න එහෙමනම් අදත් අපි පොඩි ලෙඩක් දාගත්තා , කියවල යමක් දැනගත්තා නම් සතුටුයි , හැබැයි තවත් වටින්නේ දැන ගත්ත දේ තවත් කෙනෙකුට කියා දෙන්න පුළුවන් නම් , මොකද ඒ සතුට මිල කරන්න බැරි සතුටක් ....

අවුරුදු උණුසුම නිසා මීට ඉස්සර වෙල දාපු post එකේ ලස්සන සිංදුව (නොදොඩා මුවින් හමුවි දෙනෙතින් ) ඇහුවෙ නැත්නම් මෙතැනින් ගිහින් ඒකත් අහලා යන්න පුළුවන් ....කොහේ යන්නද ... ????




ඔව් යන්න ඕනම තැනක් තියෙනවා , ඒ 22දා , වැල්ලවත්ත කුරේ ක්‍රීඩාංගනයට ... මොකටද ? ...අහන්නත් දෙයක්ද? ...ඒ සයිබරයේ සිහින බක්මහ උළෙලට ...අපිට යන්න වාසනාවක් නැතත් , අපි සුබ පතනවා සයිබර් අවකාශයේ සියළුම හිතවතුන්ට ...තව විස්තර මෙතැනට  ගිහින් කියවලම බලන්නකෝ ..

එහෙම නම් සුබ දවසක් වේවා ..මා ඉතින් යන්න යනවා මට යන්න අවසරයි .... මේ ඇහුනද ? ......යන ගමන් බ්ලොග් එකේ අයින දිගේ බලාගෙන යන්න හැමෝගෙම පරිස්සමට වැදගත් වෙයි කියල හිතෙන RSS feeds ටිකක් එකතු කළා , පලක් ඇත්නම් නෙලා ගන්න ....