අපේ පළමු හමුවීම
අසූ හතරේ ජනවාරියේ දවසක, කතළුවේ ඉස්කොලේ දේශනශාලාවේ මැද හැදෙමින් තිබුණූ 6-සී පන්තියේ ඩෙස්ක් පුටු පේලි අස්සේ නම ගැසූ මගේ පුටුව හොයාගෙන යත්දි උඹ මට මුලින්ම හම්බවුනේ.
"අඩේ මටත් මේ වගේ නම ගහගත්ත නම් මරු බං"
එකිනෙකා අප කවුරුන්දැයි තවමත් නොදනින පැයක, උඹ මාත් එක්ක කතාව පටන්ගත් හැටි තාම මතකයි, මතකයි නොවෙයි අජියෝ, මට මේ දැනුත් ඇහෙනවා.
පුටුවලින් පටන්ගත් යාළුකම
මතකද, හයේ පන්තියට එන්දි අපට පුටු ගේන්න වුනා අපේ ගෙවල් වලින්, අපි සමහරු ඒ පුටු වල නම් ගහල තිබුණා, ගුණයගේ පුටුවේ තමයි ලස්සනටම "ගුණරත්න" කියල කළු අකුරින් නම ගහල තිබුණේ, මගේ පුටුවෙත්, තාත්ත මගේ නම කෙටියෙන් කොටල තිබුණා පුටු මාරුවෙලා කරදර වේවි කියල හිතල. හැබැයි උඹේ පුටුවේ කිසිම නමක් සළකුණක් තිබුණේ නෑ, එදත් උඹ ඒ තරම් අහිංසක, විවෘත අපූරු කොළු ගැටයෙක් වුනා.
එදා ඒ හමුවීම, හත-සී, අට-සී, නමය-සී කියාගෙන් සාපෙළ දක්වා යත්දි, උඹ මගේ හොඳම මිත්රයෙක් වුනා. අපි කතා කළා, සෙල්ලම් කළා, උඹට මතකද, මගේ ඩෙස්ක් එකට දකුණූ පැත්තෙන් වාඩිවෙන උඹ හැමදාම මාත් එක්ක හෑන්ඩ් ෆයිට් කළා, දවසක් අතේ රටා හිටින්න කොනිච්චලා, "උඹට රිදෙන්නැත්ද බං" කියල පුදුමෙන් ඇහැව්වා.
"ලොකු මහේෂ්"
උඹට බෝක්කුවා කියල විහිලු කරත්දි, මට බ්ලැක්මොරිසා කියල විහිළුවට විහිළුවක් කළ උඹට මාව හැමදාමත් "ලොකු මහේෂ්" වුනා. ඒ අපට පොඩි මහේෂයෙකුත් හිටි නිසාමද කියල ආයෙත් හිතන්නට හිතුනේ, එදා උඹේ හිතේ තිබුණ හුඟක් දේ මාව විශ්වාස කරල කී හැටියෙන් වගේම, මීට මාස කිහිපයකට ඉස්සර වෙලා වට්ස්ඇප් එක තුලින් හමුවෙත්දි, උඹේ ජීවිතේ සතුට, වගකීම, දරුව ගැන හීන මාත් එක්ක බෙදාගත් හැටි මතක් වෙත්දි.
උඹේ බය
"මචං අර එවපු පිංතූර වල හැටියට, උඹ මොකද කියන්නේ, මං සර්ජරියට යන්නෝනද නැත්තං ඕක දියවෙන බෙහෙතක් බොන්නද? මට බයයි බං පපුව පළල හාට් එක නවත්තලු බ්ලොක් එක හදන්නේ, මගේ කෙල්ල තාම පොඩිනේ බං, මොකක් හරි උනොත්..."
වට්ස් ඇප් එකෙන් ආ උඹේ හදවතේ ලේ නහර වල පිංතූරේ කළුපාට අවහිර ටික ඇහට වේදනාවක් දීගෙන මට දැනුනා. මගේ දැනුමේ හැටියට වගේම, රස්සාව ඇතුලේ ලබපු අත්දැකීම්, අහපු කතා මතක් කරමින් කළ යුතු දේ කුමක්දැයි මං උඹට කිව්වේ, අද දවසේ හෘද ශල්යකර්ම වල ඇති ආරක්ෂිත බව විතරක් නොවෙයි, හරියට නියම ප්රතිකාරය නොගත්තොත් වෙන්න පුළුවන් දේත් මතක් කරමින්. අනේ, උඹට මෙහෙම දෙයක් වෙනවා කියල මට නිංක හෝ දැනුන නම් මං එදාම උඹව "බය කරලා" හරි ඉක්මණට ඔපරේෂන් එක කරව ගන්න පොළඹවනවා.
"මට දැන් හොඳයි වගේ"
ඊට පස්සේ අප පන්තියේ සෙට් එකත් එක්ක වට්ස්ඇප් ගෲප් එකේ කොයිතරම් සතුටු කතාබහ බෙදා ගත්තද? සැරින් සැරේ කතා කළාම උඹ මට කිව්ව කෑමෙන් බීමෙන් පරිස්සම් වෙනවා, බෙහෙතුත් ගන්නව කියල. මතකද උඹ මට හබරාදුවේ මූදු වෙරළේ ඇවිදින වීඩියෝ එවල කිව්වා "මචං, මට දැන් හොඳයි වගේ, හැමදාම උදේට ඇවිදිනවා" කියල.
ඒ අවසන් පණිවිඩය
පස්සේ මං වට්ස්ඇප් එකෙන් අයින් වුනා, උඹත් එක්ක කතා කරන්න බැරි වුනා මාස කීපයක්ම.
ඊයේ රෑ, නිරූපයි, තමරයි උඹ ගැන අහන්න තියෙන නරකම පණිවිඩේ, මැසෙන්ජරේට දාල තිබුණා.
"මහෙශ් .... අපේ අජිත් (බෝක්කුව) අද නැතිවෙලා .... හාට් ඇටැක් එකකින්"
"මහේශ් අජිත් නැතිවෙලා."
උඹ මේ මහ පොළොවේ නැති වුණත්
අද මේ පෝස්ට් එක, මගේ අතින් අකුරු කෙරෙත්දි, උඹ මේ මහ පොළොවේ නෑ, හැබැයි මට ෂූවර් ඉන්න තැනක උඹ සතුටින්, විනෝදෙන් ඇති.
අපේ යාළුවෝ, මිහිපිට තබා ගිය උඹේ දේහය බලන්න ආ බව අහන්න ලැබුණා. මේ හීතල හිමේ හිර වෙලා ඉන්න මට මේ හදිස්සියට එන්න විදියක් නෑ මචං.
උඹ වෙනුවෙන් කළ පරිත්යාගය
ඒත්, අවුරුදු හතලියකට කිට්ටු උඹෙයි මගෙයි යාළුකම වෙනුවෙන්, භෞතිකව කරන්න දෙයක් මට මේ වෙලාවේ නැතත් උඹ ඉන්න තැනක, උඹ යන්න කැමති තැනකට උඹ පතන දේ ලැබෙන්න කියල හිතාගෙන, කැනඩාවේ මේ දවස් වල ගල් ගැහෙන සීතලේ ගෙවල් නැතිව මහමග ඉන්න මිනිස්සු දහයකට, දවස් දෙක තුනකට උණූසුම් කෑම බීම, සහ අවශ්ය ආරක්ෂිත උණූසුම් කබා අරන් දෙන්න කියල, අපේ නගරේ තියෙන The Mustard Seed එකට උඹ වෙනුවෙන් පරිත්යාගයක් කළා.
උඹ දන්නවනේ, මං එකතු කරන පිංදහං කරන්නේ නෑ, මං පාට යුනිෆෝම් දාගත්ත, ආගම් වෙළෙන්දන්ට දාන දෙන්නේ නෑ, ඒත්, මගේ ක්රමේට කළ පරිත්යාගයෙන් ලැබෙන සතුට, ඒ මිනිස්සු මේ මර සීතලේ උණූසුම් කෑම එකක් කාළ, උණූසුම් කබායක් ඇඳගෙන නිදාගනිත්දි දැනෙන සතුට, උඹට "පිනක්" වී ලැබේවායි පතනවා.
"ආයේ දවසක හමුවෙමු මචං"
ආයේ දවසක හමුවෙමු මචං, එදාට උඹේ පුටුවත් මගේ පුටුව ළඟින්ම තියා ගනිං.
මම, ලොකු මහේෂ්
මේ කතාවෙන් පසු ඔබට කියන්නට දෙයක්
මගේ මිත්රයා "හෘදයාබාධයකින්" මිය ගිය බව ඔහුගේ සහෝදරිය විසින් ෆේස්බුක් සටහනකට එකතු කර තිබුණූ නිසා ඒ ගැන මෙහි සඳහන් කළේ. ඒ ඔස්සේම මේ ලිපිය කියවන ඔබට, විශේෂයෙන්ම වයස හතලියට වැඩි ඔබට පුංචි, නමුත් වැදගත්ම අවවාද කිහිපයක් එකතු කරනවා, සෞඛ්යය වෘත්තිකයෙක් විදියට. ඒ ඔස්සේ ඔබ දැනුමක් ලබයි නම්, ඔබේ සෞඛ්යය ගැන විමසිලිමත් වීමක් වන්නට හිතනවා නම්, ඒ සුවයේ "පින" මගේ මිත්රයාට ලැබේවායි ප්රාර්ථනා කරනවා.
❤️1. වසරකට වරක්වත් සෞඛ්ය පරීක්ෂාවක් කරගන්න
අවුරුද්දකට සැරයක් වත්, ෆුල් චෙකප් එකක් වෛද්යවරයෙක් ලබා කරවා ගන්න, ලෙඩ වුනාම දොස්තර ගාවට යනවා වෙනුවට, ලෙඩ වෙන්න ඉස්සර වෙලා, එම අවදානම වලක්වා ගැනීම සඳහා වෛද්ය උපදෙස්, ප්රතිකාර, වෙනස් කිරීම් කරගැනීමත් හරිම වැදගත්. ඒ නිසා, ඔබ තවම ඒ පූර්ණ සෞඛ්යය පරික්ෂාවක් කරගත්තේ නැත්නම් අනේ, හෙටම යන්න. හෘදය, වකුගඩු, අක්මාව, ප්රධානව ඔබේ දේහ පද්ධති වල වයසට ගැලපෙන සෞඛ්යයමත් ක්රියාකාරීත්වයක් ඇත්දැයි විමසා දැනගන්න, අවදානම් ඇති තැන් දැනගත්තොත්, උපදෙස් අනුව ක්රියාත්මක වෙන්න.
❤️2. රුධිර පීඩනය ගැන අවධානයෙන් ඉන්න
හොඳ වර්ගයක, කොලිටියක Blood Pressure Monitor එකක්, ඒ කිව්වේ බ්ලඩ් ප්රෙෂර් බලන මැෂින් එකක් ගන්න, ගෙදර තියා ගන්න. ඇත්ත යම් මුදලක් යාවි, නමුත් එය ඔබේ සහ ඔබේ පවුලේ අනෙක් අයගේ ජීවිතත් රැක ගන්න උදව්වක් වේවි. ආ.. ගත්තටම මදි, සතියකට වතාවක් බැරි නම් මාසෙකට වතාවක්වත් එකම වෙලාවක ප්රෙෂර් මැනල සටහන් තියා ගන්න. වෙනසක් වෙනවා නම්, වයසට තිබිය යුතු ප්රෙෂර් එකට වඩා වැඩි නම්, ඒ ළකුණූ කළ තොරතුරුත් අරගෙන වෛද්යවරයා හමුවෙලා, හරියට බෙහෙත් ගන්න, "හරියට" නියම වෙලාවට, දැන් හොඳයි කියල අතෑරල දාන්නේ නැතිව බෙහෙත් ගන්න.
❤️3. සතියකට අවම වශයෙන් විනාඩි 150ක් ව්යායාම කරන්න
සතියකට අඩුම විනාඩි 150ක්වත්, හොඳ moderate aerobic exercise කරන්න, වේගෙන් ඇවිදින්න, වෙලාවක් සීමා තියාගෙන ඒ කාළ සීමාවේ ඉලක්කයට කඳු, තැනිතලා ඇති පැත්තක බයිසිකලේ පදින්න, පුළුවන් නම් ජිම් එකකට යන්න. (හෘදයාබාධ හෝ වෙනත් සෞඛ්යය ගැටළු ඇත්නම් වෛද්ය උපදෙස් ලබා ගන්න කළ යුතු ව්යායාම ගැන)
❤️4. ආහාර ගැන සැලකිලිමත් වෙන්න
අධික සීනි, ලුණු, සංතෘප්ත තෙල් සහිත ආහාර, රස වුනත් සීමා කරන්න, ඒ වෙනුවට අළුත් එළවලු, මාළු ඇට වර්ග ඇතිව බත් ටිකක් කන්න. කන්න ඕන "බත් කන්දක්" නොව, මස් මාළු, එළවලු ඇට වර්ග, පළතුරු සියල්ල බව මතක තියා ගන්න.
❤️5. දියවැඩියාව තිබේ නම් පාලනය කරගන්න
දැනටමත් ලේ වල සීනි වැඩි නම්, දියවැඩියාව නම්, ඒ වෙනුවෙන් හරියට ප්රතිකාර ගන්න, ආහාර පාළනය වගේම ඇඟපත ප්රමාණවත් ලෙස වෙහෙසීම කරන්න, වැදගත්ම හරියට දැනුවත් වෙන්න.
❤️6. දුම්පානයෙන් ඈත් වෙන්න
දුම්පානයට පුරුදු වුනු අයෙක් නම්, පුළුවන් නම් නවත්වන්න, අඩුම තරමේ සීමා කරගන්න. ආ, ඒ ගමන්ම කියන්න ඕන ඔබ දුම්පානය නොකළාටම මදි, දුම්පානය කරන වෙලාවේ ඒ මිතුරන් ආසන්නයේ නොඉන්නවා නම් තමා වඩාත් හොඳ.
❤️7. මානසික සැහැල්ලුවත් වැදගත්
හිත පුළුවන් තරමට රිලැස්ක් එකේ, සැහැල්ලුවේ තියා ගන්න, තද කරගන්න එපා, පුළුවන් වෙලාවට හිත සැහැල්ලු වෙන ඔබ කැමති යමක් කරන්න. ඒක භාවනාවක්ද, එළියේ ටිකක් ඇවිදන්න යන එකද, නැත්නම් රිද්මයානුකූල හුස්ම ගැනීම පිට කිරීමද ඔබ තෝරා ගන්න.
❤️8. හොඳ නින්දක් ලබාගන්න
හැමදවසකට පුළුවන් නම් පැය 7ක, 9ක වත් "හොඳ" නින්දක්, ඒ කිව්වේ උදේ නැගිට්ටාම හොඳ රිෆ්රෙෂ් ගතියක් දැනෙන, අළුත් පණක් දැනෙන තරමට හොඳ සැප නින්දක් ගන්න.
❤️9. ශරීරයේ වෙනස්කම් නොසලකා හරින්න එපා
මේ වයස, අපේ දේහය තුලින් විවිධ ආබාධ, ගැටළු මතු වෙන්න පටන් ගන්න කාළේ, ඒ නිසා තමන්ගේ ඇඟ ගැන අවධානයෙන් ඉන්න, වෙනසක්, අමාරුවක් දැනෙන තැන, කල් හරිමින් ඉන්නේ නැතිව "හරියට වෛද්ය උපදෙස් ලබාගන්න".
නිමාවක, නිමාව
හිතේ දුකට ලියාගෙන ගියා වැරදි ඇතොත් සමාවෙන්න, විමසිය යුතු යමක් ඇතොත් අහන්න
මම මහේෂ්
