එහෙම නම් හයික් එකේ ඉදිරියට යමු.
මුලින්ම කතා කරන්නේ, හොඳ හයික් එකක් යත්දි අප ගෙනියන්නම ඕන දේවල් කීපයක් ගැන. මම මෙතැන “හොඳ” හයික් එකක් කිව්වේ, වනාන්තරේ ටිකක් ඇතුලට, පහසුකම් අඩු , නියම ස්වභාවික පරිසරයට ඇතුලුවීම ගැන. ඒකෙන් කියන්නේ නෑ, ඊට වඩා මූලික මට්ටමේ හයික් නරකයි කියලා. මේ මට දැනෙන හැටිනේ.
මැප් එක පරිස්සමට.
මුල්ම වැදගත්ම පියවර තමයි, තමන් යන්න හදන හයික් එක ගැන මූලික පරික්ෂාවක් කරන එක. පෙර ලිපියේ කිව්ව වගේම, එය පළාත් වෙබ් අඩවිය ඔස්සේ වගේම AllTrial වගේ ඇප් එකක් ඔස්සේ වුනත් පුළුවන්. හැබැයි මෙතැනදි මේ ඇප් වල ෆීඩ්බැක් දාන්නේ එක් එක් පුද්ගලයො නිසා, එහි කියවෙන සමහර තත්ත්වයන් ඔබට නොගැලපෙන්න පුළුවන් බව දැනගෙන විමසීම කරන්න. උදාහරණයක්, කෙනෙක් “ඒක හරිම ලේසි හයික් එකක්, මුදුනේ විතරක් ටිකක් ස්නෝ තිබුණා” කියන ෆිඩ්බැක් එකම පිළිඅරගෙන සූදානමක් නැතිව ගියොත් සමහර විට ඔබට මුළු ගමන පුරාම හිම, මඩ වගේ සුන්දර කරදර වලට මුහුණදෙන්න වෙන්න බැරිත් නෑ.මේ පෙර විමසීමෙදි , තමන්ට ගැලපෙන හයික් එකක් තෝරාගෙන ඒකේ මැප් එකත් ගන්න. පෙර කීව වගේ ඇප් එකක් පාවිච්චි කරනවා නම්, මැප් එක ෆෝන් එකට ඩවුන්ලෝඩ් කරගන්න පුළුවන්, එහෙම නැත්නම් වෙබ් සයිට් එකෙන් ප්රින්ට්අවුට් එකක් ගන්නත් බැරි නෑ. කොහොම වුනත්. මොන තරම් දන්න ප්රදේශයක් වුනත් මැප් එකක් නැතිව, නැත්නම් ඉන්න තැන හොයා ගන්න, ජීවිතය රැක ගන්න පුළුවන් තැනකට එන්නට අවශ්ය මග හොයා ගන්න පුළුවන් ක්රමයක් නැතිව යන්න එපා කියන උපදෙස දෙන්නම වෙනවා. හේතුව, සමහර හයික් සීසන් එකෙන් ඊළඟ සීසන් එකට යත්දි වෙනස් වෙලා, පාරවල් දියවෙලා ගිහින් , කඳු කඩාගෙන වැටිලා , ගිය අවුරුද්දේ ගිය පාර මේවතාවේ යත්දි හොයාගන්න බැරි වෙන්නත් පුළුවන්. ඒ නිසා, මැප් එක ඩවුන්ලෝඩ් කරගන්න, හෝ ප්රින්ට්අවුට් එකක් අරගෙන එය ජලයෙන් ආරක්ෂා වෙන විදියට අර විනිවිද පේන ප්ලාස්ටික් කවරයක දාගන්න. ඒ වගේම , හයික් එක පටන් ගන්න තැන, තියෙන පුවරුවේ ඇති මැප් එක ගැනත් දැනගන්න, පුළුවන් නම් ඒකෙත් ෆොටෝ එකක් අරගන්න. මොකද සමහර හයික්ස් තියෙනවා, තැනින් තැන ඇති වෙනස් වර්ණ වල සළකුණූ කිරීම් ඔස්සේ යායුතු. ෆෝන් එකේ මැප් එක තියා ගන්නවා නම් මතක ඇතිව , වයිෆයි ඕෆ් කරගෙන කැළේට ඇතුළු වෙන්න. මොකද ගමන හුඟක් දුර නම් වයිෆයි ඔන් වෙලා තිබුණොත්, ඉක්මණට බැටරි බහිනවා. කොහොමද මගදි ෆෝන් එකේ බැටරි බැහැලා, මැප් එක නැති වුනොත්? තව එකක්, මැප් එක ඩවුන්ලෝඩ් නොකර, නැත්නම් ෆෝටෝ එකක් නොගෙන ලයිව් මැප් එකෙන් යන එක අවදානම්. හේතුව හුඟක් වනාන්තර ඇතුලට යන්දි ඩේටා නැති වෙන්න ලොකු ඉඩක් තියෙනවා. (දැන් ඇපල් ෆෝන් වල තියෙන පහසුකම ඔස්සේ, මොබයිල් ඩේටා නැතත් ටෙක්ස්ට් එකක් යවාගෙන ජීවිතේ බේරගන්න උදව් ගන්න පුළුවන් වුනත් මැප් බලාගන්න වගේ වැඩ කරගන්න බැහැ)
බෙයා ස්ප්රේ ජීවිතය රකීවි.
කැනඩාවේ ඕනම වනාන්තරයක් තුල හයික් එකක් යත්දි , මැප් එක ළඟට වැදගත්ම දේ කියල මට හිතෙන්නේ බෙයා ස්ප්රේ එක. මොකද මේක බෙයා ස්ප්රේ කිව්වට, වළසුන්ගෙන් විතරක් නොවෙයි, තවත් අවදානම් ඇති විය හැකි සතුන්ගෙන් ජීවිතය රැක ගන්නට මේ බෙයා ස්ප්රේ එක යොදා ගන්න පුළුවන්. හැබැයි මේක මදුරුවන් වෙනුවෙන් ගහන්න එපා, ඒ වගේම ඇඟට ස්ප්රේ කරගන්නත් එපා. එහෙම වුනොත් බෙයාලා වැඩියෙන්ම කැමැත්තෙන් ඇවිත් හොට්ස්පයිසස් දාපු ලන්ච් එකක් ගන්න පුළුවන්. නමුත්, කයෝට්ස්, මූස් වගේ සතුන් තමන්ට අවදානමක් ඇති කරන්න එනවා නම් මේ ස්ප්රේ එකම ඔවුන්ට එරෙහිව යොදාගන්නත් පුළුවන්.හොඳම ක්රමේ හයික් එකේ ඉන්න හැමකෙනක් ගාවම බෙයා ස්ප්රේ එකක් තියෙන එක, තියෙන එක කියන්නේ බෑග් එකේ දමාගෙන ගිහින් බෑ, ක්ෂණයකින් අතට ගන්න වගේම ස්ප්රේ කරන්න පුළුවන් විදියට හෝල්ස්ටර් එකක දාල, බෙල්ට් එකට හරි අතට ගන්න පුළුවන් පහසු ක්රමයකට සූදානම්ව තියා ගන්න ඕන. අද දවසේ මිල ඩොලර් 50-80ක් අතරේ හොඳ බෙයා ස්ප්රේ එකක් මිලදී ගන්න පුළුවන්. ඒ ගනිත්දි ඔය ෆේස්බුක් මාකට්ප්ලේස් වගේ තැන් වලින් ගන්න එපා. හයිකිං උපකරණ ගන්න පුළුවන්, පිළිගත් තැනකින් ගන්න. එතැනදී ඔබේ තොරතුරු දීල ලියාපදිංචි වීමක් වෙන්නත් වේවි, මොකද මේකම සමහර විවිධ අපරාධ සඳහාත් යොදා ගන්නා නිසා. ගත්තටම මදි බලන්න, කල් ඉකුත් වීමේ දිනය , ස්ප්රේ කරන ක්වික් රිලීස් ට්රිගර් එක හරියට තියෙනවාද කියල. හැබැයි ඕක චෙක් කරන්න කියල නිකං ස්ප්රේ කරන්න එපා. සාමාන්ය බෙයා ස්ප්රේ එකක තියෙන්නේ තත්ත්පර අටක විතර ස්ප්රේ ප්රමාණයක්. ඒ කියන්නේ, ඒ තත්ත්පර අට ජීවිතේ පරිස්සම් කරගන්නට තියා ගන්න. සමහර ආයතන බෙයා ස්ප්රේ එක පාවිච්චි කරන හැටි පොඩි පුහුණුවකුත් දෙනවා, එහෙම නැත්නම් පිළීගත් චැනලයකින් වීඩියෝ බලලා හරි හරියට බෙයා ස්ප්රේ එක පාවිච්චි කරන හැටි දැනගෙන මිසක කැළේට ඇතුලු වෙන්න එපා.
ඊළඟට වැදගත්ම දේවල් විදියට හයිකින් බෑග් එකේ තියෙන්නම ඕන දේ අතර,
SPF 30වත් සන්ස්ක්රීන් එකක් වැදගත්. හේතුව මේකයි සමහර වෙලාවට හයික් එකේ මුල් කොටස, එහෙම නැත්නං පිංතූර බැලුවම කිසිම හිරු එළියක් නොවැටෙන අඳුරු බවක් පෙනුනත්, හයික් එකේ මැද ඉඳන් කාන්තාරෙක යනවා වගේ අවුවේ පිච්චෙන්න වෙන්න ලොකු අඩක් තියෙනවා. විශේෂයෙන්ම කඳු සහිත හයික් එකක නම්. ඒ නිසා, සන්ස්ක්රීන් එකක් හරිම වැදගත්. ඔය එක එක සුවඳ ගහන ඒවා ගෙනියන්න එපා. මොකද සුවඳ ගහන සන්ස්ක්රීන් ගාගෙන ගියා කියන්නේ, නිකංම නිකං සපර් එකක් නොවේ, හොඳ සුවඳට හදපු සපර් එකක් වළස් පුතාලට දුන්න වගේ වෙන්න පුළුවන්.
හෙඩ් ලෑම්ප් එක ජීවිතය රකින්න උදව්වෙන තවත් වැදගත්ම දෙයක්. විශේෂයෙන්ම ෆෝල් එකට කිට්ටුව හයික් යත්දි අප හිතනවාට වඩා ඉක්මණින් කළුවර වෙලා ආයෙත් එන මග හොයා ගන්න වුනත් බැරි වෙන්නට පුළුවන් අවස්ථා එනවා. සමර් එකේ වුනත් වෙන්න බැරි නෑ. ඒ නිසා හෙඩ් ලෑම්ප් එකක් හරිම වැදගත්. දැන් කෙනෙක් කියන්න පුළුවන්, මගේ ෆෝන් එකේ ෆ්ලෑෂ් එක තියෙනවානේ කියල. ඒත්, එකක් ෆෝන් එකේ බැටරි ඒ වෙත්දි බැහැල වෙන්න පුළුවන්, ඊටත් වඩා ෆෝන් එකේ ෆ්ලෑෂ් එක අල්ලගෙන එනවාට වඩා, හෙඩ් ලෑම්ප් එකකින් මග හොයා ගන්න එක පහසුයි, ආරක්ෂිතයි.
කතාව දිග වැඩි වෙන නිසා, ඉතිරි ලබන සතියට.